Nai chik a hohna hiveh!

Ka khua ua pu-pu khat le kamsiam lou lotel,nau min phuahna a kipah thugen “ Chial louh tanpha le nahong ua…” chi, aman chu ahiloulam a agen kithahah lou e’ichu.Huchidan deuh le hituan lou chial a ka-om ziak in Ka inn-luahna uapan Bag nungpuak in Bus no. 46 ah katuang hi. Tutna lah kitanglou ahihman in Bus sung a sik-chiang kizan, mi' let thoh dia abawl uh hinapi kei kaki khaitoh sim a...CMBT(Chennai Muffusil Bus Terminus) katung hi. Crore 103 bei a kibawl, Asia's Biggest Bus terminus achihzen uchu, New Bazar bus terminus sang in chuh alian zaw tham na a, “Takpi in maw?” chih theih thouleh kilawm.2002 a azoh tunglai unchu hoih mahmah ding ahi chih kimuthei hi. “Direct! Direct!” chi a kikou chelchul chu omlou in Ticket counter a ticket la in ka bus di kazong chenchen a, Ka Bus di kamuh tak a khaa...A bus kiang mah ale a conductor pa'n le ticket anazuak daih!

Bus san gimgem, a tutna bang tak sim mahmah ah mulhau deuhmai leh lian deuhmai nupa kopkhat toh katu khawm lelat ua, vomdeuh thilthel kei le utuh ata di'u mah kibang ven aw. Ka hohna dipa'n hon fone a, kapai nadi kachian nahiam chih hon dong thakthak hi, kei kia pai kahihman in leh lamkal a ka kumkhiat ngai di ahihman in ka kum khiat nadi kapelh khak di bang lau in hon tai gamgam zozen veh e..Kimuang deuh in, “Thei zezen e, k'ong tun chi'a di ana koih ou” peuh chi'n kahunsak uhi. Ni hong sa deuhdeuh a kagei a nupa tute kho-ul hongkai panta.....ka kawtsuak phial!

Dakkal 2 lampi ahi a, Mel 107 lel himah leh kholum luat ziak in sawtdiak ablang! Keileng tungdek tadia kigingta a dakkhiat bawl di kachihleh mi tamsim ahihchia kagei a dingte kadot leh “ Nexdie Stopeddi ” hon chi ua. Bus a hong khawl in kakum tei ta. Piltuak deuh a kakhodak hang in abuailam kahi, signboard kitakte I en alah amau pau kia a kigelh kisim theilou hiven. I sim theih sunsun chu Airtel, Aircel, Vodafone chih khong kia hi. Kahohna dipa kafon non a, lampi a mihong paite peuh kaban dotleh, agen chiangtak in theikei mahleng “kumbaih lua neifoi... Autorickshaw la in la Ranipet kichih namun ah Bus man non in” chi abang! Ke'nle auto ngak- Auto le I deih chiah Lamka a townbus ngak toh kibang-I deihlouh/poimohlouh tata chia ta’tam. Hongpai khong, tuanman dek(bargain) zomah, force of habit hi’nteh. Kadek lehchu utkei thou, honpai san dek mawk! Dek chikei e chi in, “Eih! Eih! Eih!” chi'a kakham thak non a, Katuang ta. Auto pute'n khopi banglou a hon khembawl lou ding uh ahi chi a kalawmpa honhilh katheikhe thak phing ve.

Ranipet tung khong! Bus stand mitsuan pah, bus khat ana om, tawmlut gaih! Asung katun a kakhodak leh den a katuan na Bus mah ana hi! He..he..Singpi dawn leh passenger ngak a ana khawl uh a'ihtuh. Zumhuai sim na a honthei siam sim zaw hinte Bus Conductorpa'n hon nuihsan heuhau. Huainung chuh amau pau katheih dandan a kan in Conductorpa' hon 'signal' dichu ngak in a melhoih leh hoihlou thu hilou....ka melh cheuhcheuh a ka enchim kei hial e. Dakkal lang khong katai zoh un katung khong ei...Thiruvallam-Vellore (Eilawi lam-et topna deuh a ineih uh damdoi inn omna kha) apan mel 13, NH - 04 dung a om kholian lou chilik, inn kigamla simsim a teng vikviak. Hiai muntak bang dia kalawmpa'n azi neihna dia tel adia aw kachi, kitenna sum sendi sukniam ut lampang deuh chu hidi'n kagingta. Keibuai pih dichu anak hihlouh!

Kalawmpa chu ka fone leh puja neidek jual minit 10 khong kangak ngai di ahihdan hon gen, lampi gei a singkung nuai a suangtung a tut-ngak.Mi'n hon fon di ngak leh mi hongpai di ngak chih khong chu haksa kasak mahmah telak a khat eive. Meltuam deuh mai khat in bang hong hih a set mamah a hiai kawmkawm a chi uh zaw ahi di, hongpai peuh in hon en tuan thakthak ua, akhente lah hong lehkik thak jojen in hon chibai mawk ua, naupang hon in hon mu utdiak uh- Tui bang honpiak utoh, bangbang hiam om nenaw khum a khum khong honpia ua- chim manlou in lawmpa honpai a huchin kaki pankhe ta uhi. Oh! Hummer SUV a hongpi uh chih kagen khata hia? Houkei..I tuankhak patna eifoi.Na bang a..?? Huaile a gamdang apan a import uh hizomah!

A khosung katot khakna munte uh ka etvel chia Nungak-Tangval tamhetlou a mu inga lawmpa kadot leh gamdang ahihke'h khopi a nnasem a om tangpi uh ahihdan honhilh. Sawt tailou in “Kalyana Mandapam” katung ua, huai ah ka room di ah honkha a ahohna di om achih ziak in honpot khiat san hi. Hiai “Kalyana Mandapam”(Kitenna hall) sawng thum abawl ahi a, anuai nungpen annek na hall, sawngkhat na leh nihna hotel room dandeuh a kibawl room ngen in adim hi. Asawng thumna ah hall zaitak a om a, hiai mun chuh “ Kasauti Zindagi Kileye ” hia bang a hiam khat serial a Anurag leh Prerna meikuang kim a apaikual dan a paikual nadi mun ahi. Hiai roomte ah alawm-avual leh tanau lainate tunna mun lah hi lah kitenna hall diale zang geih I chih chia eilam ahle Hall tampi bawl leilui sang in hichi dandeuh program or huchilou dandeuh programme le hi, hall meeting leh meet tuamtuam a zattheih di kinei leh chinchi mahmah leh kilawm sa ing.

Room a lupna tung a kana-kizan penpan leh kong hong kikiuh, kava hon leh Tanvalnou mial bilbel thum in Kalawmpa'n a sawl ahihlam uh gen in Vellore lam ah va “Touna” pheiding in reception hun a tung di kahihdan uh hon hilh uhi. Hiai mun a munhoih omlou maw kachih leh 'very dirty' chi uh ahihman in kava zui aka. Tangval nou kachih hang a a-awm(Chest) tan uh khong kipha chu hi.

Reception hun in katung ngei ua, Mounu leh Moupa dohsang tung a ding in atanau laina leh lawm-le-vualte'n Present piakna hun ahi mai. Kivual dendan in lim kilakpih, Huai zohchia pai uh! Lawm dangte le hong tungsuk ngei ngai ua, amau le hon tawi beh uh a'ihchia room a kava 'behlap' cheuh uhi. Huchi'n koule Reception neihna lam kazuan uhi. Lutphet, lawmte hong kipan pah uh, hong kipan pah kachih chia kha – Mounu leh Moupa dinna nawldeuh a Local 'Band'te'n tumging ngaihtak tum ging noknok uh hiven. Huaite kiangdeuh a 'dance floor' didan deuh a mun-awng om a lam a lam sawksawk uh. “Tak-a-rang!! Tak-a-rang-rang-rang-taka-rang!!.....!....!! ” Chimai !! TV channel dang I zon nalam a South Indian TV channel khong imek khak chiang a alam sawksawk, alawm loplop dan ua. Keile kavatel lamzaw gen tuan se ngaidah heh aw.. Huchi'n, present kapia ua ann-nekna lam kazuan uhi. Sa meh di kakisak leh hidek lou daih! Muslimte’ kitenna hileh chu Biryani kine di hi a…

“A kitendan uh sum tam beichi petmah..chiphetle. Kitenna hall khelhman, tanau-lainate kuan-le-pai man leh ann-nekman, gold man, zu-man le hilai. Hiai hun achu a tanaute (adiak in pasal lamte) uh duh-deihteng piak ding in lungkimtak a paisak di chih himai. Eilam a dan akiten I ngap louh pii toh hiaite' kiten dan bang a kiteng hile tuuuu....In gam di ikei maw.. Amau le a In-gam zouhial mah ua. Tulai dan mah chih ut huai didan eivoi anei loute adia....amau eikha kagen” chih khong ka lupna tung ah ka ngaihtuah a, Zingchiang zingkal a kiteng taktak pan di’u hilai !! Akiten taktak pen uchu family affair deuh a’ihman in pai mai di chih chu hi.