Zomicoolmood's Fantasy continues......

TUAMUN AH
Gamla louchik lah gamdang,Phaitam mahmah a nasem a kuan akihih ban ah apau uh kithei chiikta ahih manin, bawngzawi khong zui a Border Security te kapelh nung un bel bangmah buaihuai nading omlou in ka tupna munding uh 'Tua Khopi' katung uhi. Muanmoh huailou pen a omding chih tuh ahi masa phot mai.

Kal thum bang ka omta ua, ka van poimoh dingte uh hongtun ngak kawm in, gari workshop peuh, Hotel leh khopi munchih-kilchih ah septheihna mun tuamtuam a sem in, bang thuthak oma chih nitak chiang in ka kihihilh tuah zel uhi. A khopi mapte leh konzing tuamtuamte vel chian thakthak a ka omlai un kong hong kikiu ging kauh khauh a, kava et guk leh Marco ana hi a, Marco bel mimuan huai mahmah a kinei, galvan a sumdawng siamnel tak ahi. Amah lawkna di ahih nakleh koimun peuh ah zat theih phial khat a sumduh, sum a kamhum khit ahihmanin, 'muanhuai' tadih phot di'n ka gingta. Kongkhak kava honleh van hong koihdek uh ahihdan hon gen nutnut kawm in hon pawlut tultul uhi. Marco leh alawmte pasal 2 bel sawt omlou in apai khe kikpah uhi, sawt a om uh leng kaphal kei bok. Ka galvan specialist uh- Coolmood in hon vel vitvit, hon khoih tuah laplap a, bangkim hoihna in kim na e chih a chet zoh in azing chiang a target masa ding bang chi bang a semsuah ding chih ka houlim uhi.

Ka target uh bel, amau laka tallang mahmah leh azah mahmah khat uh ahi hi. I gam ading in bangmah thilsia hihkei mahleh, mipi' zah leh thulak, laisiam takmai leh amau' gam adia Siamsinna lam a kikhekna tuntute' laka makai khat ahi hi.University teng enkai dia a Govt. un aseh dngzui in, Z-category security piak hi a, bangchi bang a khoihtheih ding hiam chih ka kikupkup chiang un hunbi khatkia om(chance khatkia om) chih kathei uhi. Hiai chance kathulh( ka miss) zenzen ualeh bel, dam in kapot khe kei ding uh chih kathei chiat uhi. Panmun ding, kihepkhiat na munding chihte ka et-chet thakthak zoh un, sapneupa'n ka vanzat dingte uh hon en-fel a, katawldam phot uhi.

Zingkal dak 4:00 geih in kapan mun ding uah ka omta uhi. Ka panmun uh bel, Target omna apan gamla lou, Corporation building tung ahi hi. Bok hethat in ka target pa' uh lemlak kama u'ah kaphah uhi. Kei leh sapneupa hiai nna semsuah dia kuan kahi ua, sapneupa chu: miki saphuh litlet, neu fel liuleu khat ahi a, alusuk hat mahmah hang in Sniper meithal zaw amah adia bawl mawngmawng mah ahi diam chih ding tukin a siam in azei hi. Dak 4:44 aging kuan in, mial thithiai lai, ka target uh zingkal exercise la ding in hong pot khia a, anung ah abodyguard in hon zui hi ahi chih ka etletna(durbin) apan kamu thei hi. Hiai hun mah kangak uh ahihman in sapneupa kasap pahleh hon dawng hetkei a, ka et pheileh ana lusu duauduau man, Ka tong a tauhphei gaih in kaphawng a, aman leng a thau hon kam in hon ngim vengveng a......a KAPTA!!!
Ka target uh chu leilak a puk in kisat letlet in atang nonkei chih ka chet chiang in, atal akolh sim veuvou ziak a 'keuh' chi a kasap uh: thugelh,internet leh Propaganda specialist, “manta” kahihdan uh kahilh zoh a Sapneupa ka etphei leh a meithal ana ngiim veuvou lailai a, ka sap leh a bodyguardpa le kap tum ahihdan hon gen mahleh 'I target lou kapdah ni' chi in kaki hemkhe ta uhi. Silencer kithuah thau(meithal) kizang ahihziak in tua Bodyguardpa'n bel amuanmoh nana kap in akap zatzat a, abuai mahmah ve!. A chaang in zaw ka omna lam uh hon kapkha dek sam mahleh ngaihsak tham ahi kei. Innsung aom Security guard dangte buai mahmah chelchul ding un ka nagaihtuah hi.

Huchia ka kihep khiat laitak un, coolmood leh puphual in 9mm(thauneu), kou kihepkhiat na lehlam daih u'ah,Gari neu a taikawm in avang kim leh ka target kapna uapan gamla hiaihiai in ana gin(puaksak) uhi. Hatdeuh a taikawm ahihziak un adelhtu omleh leng, adelhphak matham un akihem khekhin manding uh chih achiang khopmai. Puphual bel,pautamlou/michingkam khat ahi, khawl(Machine) lam peuhzaw a ngapthoh in a zohthoh mahmah ve. Gari sia bawl khong leh puakthei(explosives) siamtungtuang(specialist) a kazat uh zaw kazang khial khol hetkei ding uh.
Keuh inleng a nnasep ana zou mahmah ngei a, Nitak a kanasep uh lohchin lopna a ka 'Touna' laitak un TV ah thuthak puang tu'n “ hiaite'n amau khutnung ahi chi in puang khin mahle uh, amau pawl hilou ahi chi'n thupuan bawl non uh, thuchian kimzaw ngak hilel”...Keuh le hih fuh kisa sim ahi ngei ding, bang hiam gen di honsa in hon mitsuan gaugau mahleh kadai a, aman leng agei a sahou la in ahai matmat hi.

Hiai ka nna sep uh huzaap angaih mahmah mai a, lampi zuitoh, Bandh bawl toh abuai hial zelzul ua, Kalkhat sung bang Siamsinna Inn tengteng khak bikbek in om hi. Koumah bangleng bandh, dharna, Gari tyre hal chihte khong in kava hahpan mahmah mai uhi, kuamah muanmoh a omlouh ding chih ahihziak in. Helpawl ngoh a omte bel govt. inle azat thou, I gama buaina piangsaktu dia a tawsawn uh ahihmanin govt. kialou, a mipi mahmah toh leng aki tanauna uh buaizou phial ahihdan thuthang kiza hiauhiau ahihman in, biltai huai kisa chiat ahi ngei ding Sapneupa'n keuh' nung nui themthram in a beng thauhthauh hial.Kou ngei leng bangtan hiam bangmah hihlouh phot hong ngai ahih man in, ka vanzat te uh thaunilh in kakem hoih phot ua, kasepna chiat uah sem in thuthak leh thu tuamtuam, ka maban target ding ua poimoh dingte uh kaikhawm in ka omphot uhi.