Simtute, tutung zaw 'serious note' deuh in tulai Chennai a hong mualliam khate apan ngaihdan tamlou kon gelh him awle. Awlmoh zou a diangzou/man kahi kei hial,mi' gen a kamuh hitangpi mahleh adik louhna om hial leh atheite'n “kihilhchet louh di” chihthu omlah hilou a maw.
Sawtnailou kum 2008/09 vel apan in eimite'n Chennai boh in in boh ua, nawn in I kinawn suk uhi. Sep theihtheih sem a akhente'n sum muhna hoihtak leh innkuan vakna hoihtak a azat theihlai un, akhente' adi'n khamtheih hihna dilel un zang maimah ua, khelah gawp a hai-om mawk le aki-om hi. Minsiat huai pipi a eimite Police khut khong leh Taan-inn a I taan tekhong thukhat hileh, hiai Khamtheih hihte'n imi-isa sumualphou in mi nawngkai sak mahmah in kamu hi.Nikhat tei, khamtheih hihlou pi kholai ah vangsiatziak a sihna tuak om zenzen le'ng le Policete'n OD hon hihsak mel uh kuan athei a.
Chennai khopi ichih hih, mi'n “Metro-Village”(Khopi-Khota) ana chi namah ua adik mahmah nachiang om hi. Khopi ah teng in nalh taktak in kichei mahle uh, alungsim uh ST/tuantual lai mahmah in kulmut mahmah uhi. Pasal in half-pant teng a kholai pawt chiing vaklou unchin, ei huchia iva omleh hon munuam lawmawk uh chihdan neuhneuh khong te leh I seppihte kiang khong a ngaihzawng nei ihihdan igen khak leh ofis pumpi'n thei I chih chiang a, vengkhat a Policete'n/I Innluahna te'n O.D a North East mi himhim ahong sih chiang ua, “NE mite khamtheih hih hat” chih thu in khopi sung velsuak zou mahmah sim hi in kathei hi.
Atuan tual mahmah hang un, mi panpih, mi houpih chihte a taima ua, himahleh, dankalh a gamtang kha amuh uh lehbel Police ah report pahpah ahihman un policete' nasep suzangkhai thei mahmah uhi. NE mi lak ah eimite hih mi' tawndan neuchik leng zuih sawmlou, Innlam a I puansilh-niktente mah silh a tenga, Innlam a I nek bangbang nek sawmte ihih laizang man un, a selam ah minthang abaihlam diak hi'n kathei. I omna mun toh kituak ding deuh a neuchik eimah kikhek lamdang deuhpen amau ading mah inleng a etnuam deuh hi, chi uhi. Innhoih lah luahzoulou hang a, “developed slum” lak khong a teengzou liliai in I kicheina hong “hollywood” luat lenlon chiang a I tenna mun-le-mual leh inveng-inpamte toh hong kituaklou lawdeuh hiven.
Tutan a Chennai a eimi sihna tuakte avek phial un Khamtheih overdose ahi uh, chileng ka khial lawmlawm keiding. Chennai a nnasem dia tungphet, sem le sem man nailou a O.D, A sepna a Anaesthetic peuh a ana O.D, Innluahna a O.D chih khongte Zomi Welfare Committee Heutute'n avadelh chiang un Policete' mai leh Doctorte' mai ah azum tuntun hun uh omding in kangaihtuah hi. “Sungna” chi a mawk vuiliam theih mawk hilou a post-mortem bang bawl a, Policete' lak a sai neuhneuh ding tampi sai a vuiliam zel ZWC heutute phat tham ching uh kasa mahmah hi. Innlam apan lah “Huailam ah vuimai ua” chih ngen hi tangpi lai in thei ing. Innlam apan a kipat dek ua, hong sih di'u theisa a hon khakhia uh hileh kilawm sakna chiang bang nei ing. Chennai a eimi omte hih Delhi,Mumbai, Kolkata, Bangalore khopite banglou in, Sepna lian nei leh heutu piching makai thei ding mi om(nai)lou. Naupang chikchik ngen kimakaih a om nemnem, hichibang hun khong chiang a, chipih-sapihte chi a awlmoh ziak a, vadelh heutute akhavat mahmah hun uh omding in ka gingta.
Hichibang a sihna hongtuakte atangpi in amau om-om a om, kuatoh kisai khollou leh pawlpi khong a leng kihel kholloute ahi tangpi uhi. A sihlam uh itheih toh khopi khat a omkhawm hihlam kithei chihdan hi mawk! “A khamtheih hihna ding uh sum valohkhia thei ahihbek leh ahoih” chi in ngaikei leng chi peuhmah ing, Innlamte. Tate' luang leng muhkhak louh poisalou kitamta hi'n mu ing. Mi hongpai ding leh ding louh uh lah pawlpi' mawk daltheih himawklou a, pilvang theilou zen a khamtheite zaw khopi khong a kisawl sangin....chithei leng uthuai kasa. Kuapeuh' insung a tungthei thil hi, hitamahleh Inkuan pihte' pilvanna neuchik ziak in I sanggamte, ita-inaute, inn apan gamla pii a mualphoutak a asih ding uh veng thei hilou I hiam chi ing.
Ana gimpih leh buaipih te'n, a gimluat lung un “ Chennai Rehab. sa na'u maw?” chih theih maileh kilawm in kangaih tuah hi.
